पहिरो खस्दा सिद्धार्थ राजमार्ग अवरुद्ध

 

स्याङ्जा । पहिरो खस्दा सिद्धार्थ राजमार्ग अवरुद्ध बनेको छ । हिजोदेखि परेको वर्षाका कारण आज बिहान साढे ६ बजेतिर स्याङ्जाको फेदिखोला गाउँपालिका–२ भालुपहाडस्थित सिद्धार्थ राजमार्गमा माथिबाट पहिरो खसेको हो । पहिरोले सडक पूर्णरूपमा अवरुद्ध भएको जिल्ला प्रहरी कार्यालय स्याङ्जाका प्रहरी नायब उपरीक्षक एवं प्रहरी प्रवक्ता राजेन्द्रप्रसाद अधिकारीले बताउनुभयो ।

पहिरोका कारण सिद्धार्थ राजमार्गको पोखरा–स्याङ्जा सडक खण्ड बन्द भएको छ । सडकमा अहिले सवारी साधनहरुको जाम रहेको छ । भालुपहाडमा सडक विस्तार गरिएको ठाउँमा अहिले पनि पहिरो झरिरहेको प्रहरी प्रवक्ता अधिकारीले जानकारी दिनुभयो ।

सडक विभाग तथा सम्बन्धित निकायसँगको समन्वयमा बाटो खुलाउने कार्य थालिएको छ । तर अझै पानी परिरहेकाले सडक खुलाउन समय लाग्ने बताइएको छ ।