काठमाण्डु, १० जेठ– प्रतिनिधिसभा विघटनविरुद्ध विपक्षी पाँच
दल सम्वद्ध विद्यार्थी संगठनले आज देशभर प्रदर्शन गर्दैछन् । काँग्रेस, माओवादी केन्द्र, एमालेको माधव नेपाल समूह, जसपाको बाबुराम–उपेन्द्र समूह र
राष्ट्रिय जनमोर्चा सम्वद्ध विद्यार्थीले असंवैधानिक रुपमा संसद विघटन गर्ने
राष्ट्रपति विद्यादेवी भण्डारी र प्रधानमन्त्री केपी ओलीविरुद्ध प्रदर्शन गर्न
लागेका हुन् ।
काठमाण्डुको प्रदर्शनी मार्गमा अपराह्न ३ बजे
विरोध प्रदर्शन गर्ने तय भएको माओवादी निकट अखिल क्रान्तिकारीका वरिष्ठ उपाध्यक्ष
सुरेन्द्र बस्नेतले जानकारी दिए । बस्नेतले कोरोना महामारीलाई मध्यनजर गर्दै
सामाजिक दूरी कायम गरेर प्रदर्शन गर्न लागिएको बताए ।
आन्दोलनकारी पाँच संगठनद्वारा जारी विज्ञप्तिमा
प्रधानमन्त्री ओलीका हरेक असंवैधानिक, अलोकतान्त्रिक र स्वेच्छाचारी कदमलाई संविधान
रक्षकको कर्तव्यबाट च्यूत भएर संवैधानिक राष्ट्रपतिसमेतले निरन्तर साथ दिनु
विडम्बनापूर्ण रहेको उल्लेख छ ।
प्रतिनिधिसभा विघटन गर्दै असंवैधानिक जगमा उभिएको
प्रतिगामी सरकारले कोरोना कहरले आक्रान्त जनतालाई राहत र सहुलियत प्रदान गर्नुको
साटो एकपछि अर्को राष्ट्रघात, कुशासन, महङ्गी र भ्रष्टाचार थोपरेको आरोप विद्यार्थी
संगठनहरुको छ ।
Post a Comment