काठमाडौं ।
कोरोनाभाइरसको पहिलो चरणको संक्रमणले सुरक्षा निकायलाई थिलथिलो बनाएको थियो ।
कोभिड–१९
संक्रमणको दोस्रो महामारी शुरु भएपछि नेपाली सेना, सशस्त्र प्रहरी बल र नेपाल प्रहरीमा फेरी
कोरोना संक्रमण फैलिएको छ । नेपाली सेनाका २२५ जना सुरक्षाकर्मी आइसोलेसनमा छन् ।
सैनिक प्रवक्ता (सहायकरथी) सन्तोष बल्लभ पौडेलका अनुसार १३३ जना सैन्य कर्मचारी
अस्पतालमा छन् । अरु चाहिँ सेनाले तयार गरेको आन्तरिक आइसोलेसन र होम आइसोलेसनमा
बसेर कोरोनासँग लडिरहेका छन् । सशस्त्र प्रहरी बलका १६५ जना सुरक्षाकर्मी
संक्रमणको शिकार भएका छन् । काठमाडौं उपत्यकामा संक्रमण पुष्टि भएका २२ जनालाई
बलम्बुस्थित एपीएफ अस्पतालको आइसोलेसनमा राखिएको सशस्त्र प्रहरीका प्रवक्ता डीआईजी
राजु अर्यालले बताए ।
प्राप्त तथ्यांक अनुसार नेपाल
प्रहरीमा ४८४ जना सुरक्षाकर्मी संक्रमणको शिकार भएका छन् । तर, प्रहरी कर्मचारीको
मनोवल खस्किने भन्दै नेपाल प्रहरीले संक्रमितको विवरण सार्वजनिक गरेको छैन ।
‘प्रहरीमा व्यापक संक्रमण छैन, ठिक ठिकै छ’ प्रहरी प्रवक्ता
एसएसपी बसन्त कुँवरले भने, ‘प्राविधिक कारणले संक्रमितको तथ्यांक दिन असमर्थ
छु ।’
प्रहरीमा जिल्लादेखि प्रधान कार्यालयसम्म कोरोना
फैलिएको छ । जिल्ला प्रहरी कार्यालय सुनसरीमा कार्यरत ४ जना प्रहरीमा कोरोना
संक्रमण देखिएको छ ।
महानगरीय प्रहरी परिसर काठमाडौं मातहतमा ३०
जनाभन्दा बढी प्रहरी संक्रमित भएका छन् । प्रहरी प्रधान कार्यालयमा पनि उल्लेख्य
संख्यामा संक्रमित भएका छन् । गत साल पहिलो चरणको संक्रमण शुरु हुँदा प्रधान
कार्यालयमा सवारी चालक शाखाबाट संक्रमण फैलिएको थियो ।
सीडीओदेखि एआइजीसम्म संक्रमित
कोरोना संक्रमण नियन्त्रणका गर्ने नेतृत्वदायी
भुमिकामा रहेका गृह मन्त्रालय मातहतका प्रमुख जिल्ला अधिकारीदेखि प्रहरी अतिरिक्त
महानिरीक्षक एआइजी) सम्म संक्रमणको शिकार भएका छन् ।
संक्रमण पुष्टि भएपछि ललितपुरका प्रमुख जिल्ला
अधिकारी ढुण्डीप्रसाद निरौला आइसोलेशनमा छन् । महानगरीय प्रहरी परिसर काठमाडौँमा कार्यरत दुई डीएसपी
राजकुमार केसी र नरेन्द्र चन्द पनि कोरोना पोजेटिभ भएपछि आइसोलेसनमा छन् ।
वैशाख ८ मा कोरोना पोजेटिभ देखिएका महानगरीय
प्रहरी कार्यालय रानीपोखरीमा प्रमुख (एआईजी) हरिबहादुर पालले कोरोनालाई जितेका छन्
। होम आइसोलेसनमा बसेर कोरोनालाई जितेका पाल नियमित काममा फर्किएका छन् ।
चितवनका एसपी ओमप्रसाद अधिकारीलाई गत बैशाख १४
गते संक्रमण पुष्टि भएलगत्तै कार्यालयको आवास गृहमा नै आइसोलेट भएर बस्नुपरेको छ ।
उनीसँगै चितवनमा अन्य दुई जना प्रहरी कर्मचारीमा कोरोना संक्रमण भएको छ ।
यस्तै सिन्धुपाल्चोकका एसपी राजन अधिकारीलाई पनि
गत बैशाख १८ गते कोरोना संक्रमण पुष्टि भएको छ । संक्रमण पुष्टि भएपछि उनी आवास
गृहमा नै आइसोलेट भएर बसे । र, आइसोलेसनबाटै जिल्लाको कमाण्ड चलाइरहेका छन् ।
एसपी अधिकारीसँगै सिन्धुपाल्चोकको इलाका प्रहरी
कार्यालय हेलम्बुका ५ जना प्रहरी कर्मचारी र जिल्ला प्रहरी कार्यालयमा कार्यरत
अर्का १ जना प्रहरीलाई संक्रमण पुष्टि भएको छ । उनीहरु सबै प्रहरी युनिटमै
आइसोलेसनमा बसेका छन् ।
कोरोना संक्रमणको दोस्रो लहर सुरु भएपछि बागमती
प्रदेशका १० जिल्लाका २९ जना प्रहरीमा कोरोनाको संक्रमण पुष्टि भएको छ । काभ्रेका
९ जना, सिन्धुपाल्चोकका
एसपीसहित ७ जना, मकवानपुरका ४ जना, रसुवाका ३ जना, चितवनका एसपीसहित ३ जना, धादिङका २ जना र
नुवाकोटका एकजना प्रहरी कर्मचारीमा संक्रमण पुष्टि भएको छ ।
संक्रमण पुष्टि हुनेमा फिल्डमा खटिएका
प्रहरी जवान रहेका छन् । सिन्धुली, रामेछाप र दोलखामा कार्यरत प्रहरी कर्मचारीमा भने
हालसम्म संक्रमण पुष्टि नभएको बागमती प्रदेश प्रहरी कार्यालय हेटौंडाका प्रमुख
प्रहरी नायव महानिरीक्षक डीआईजी बसन्तकुमार लामाले जानकारी दिए ।
त्यस्तै प्रदेशमा कार्यरत कुल ५ हजार १७९ जना
प्रहरी कर्मचारीमध्ये ४ हजार २१८ जना प्रहरीले कोरोनाविरुद्धको खोप लगाएको डीआईजी
लामाले जानकारी दिए । अन्य ९६१ जना प्रहरी कर्मचारीले विविध कारणले खोप नलगाएको
लामाले बताए ।
बागमती प्रदेशमा पहिलो चरणमा ३९१ जना प्रहरीमा
कोरोना संक्रमण पुष्टि भएको थियो भने एकजना प्रहरीको मृत्यु भएको थियो ।
Post a Comment